E GASTO PRINCIPAL DI GOBIERNO

Na aña 2014 prome minister Mike Eman a bay den hongerstaking paso e Gouverneur di Aruba a haya opdracht for di minister Plasterk (Binnenlandse Zaken en Koninkrijksrelaties) pa no keur e begroting di Aruba goed. Segun minister Plasterk e Gobierno di Aruba no tabata haci suficiente esfuerzo pa baha e begrotingstekort cu tur aña ta zorg pa e debe di e pais subi. Ora Gobierno gasta mas placa cu nan ta haya como entrada nos ta papia over di un begrotingstekort.

Manera bo por wak den e grafiek ki bou, ta parce cu minister Plasterk tabata tin rason. E staafjenan shinishi ta representa e begrotingstekort di cada aña, anto e bara mas largo biña ta mustra con e begrotingstekort ta acumula y subi Aruba su debe. Aunke cu e begrotingstekort keda mas of menos stabiel tur aña, of te hasta baha, e debe di e pais ta keda subi. Ora nos debe keda subi e interes cu nos tincu paga tambe ta subi. Na 2015 Gobierno a paga 200 miyon na interes.  

 

Verloop geaccumuleerde exploitatie (in AWG)

Fuente: Algemene Rekenkamer 'Rapport onderzoek jaarrekening Land Aruba 2015'

 

Belasting na Aruba ta relativamente halto. Dus unda tur e placa ki ta bay? Ki tanto gasto e Gobierno di Aruba tin? Ami a pensa inicialmente cu parti di e problema a bin door di AVP su varios proyectonan manera Linear Park, caminda nobo entre Oranjestad cu Savaneta, etc. Mi tabata critico over di e proyectonan aki, no paso mi no ta haya nan un bon idea, pero mas pasobra mi tabata pensa cu no ta sabi pa gasta placa cu bo no tin.

Aparentemente mi tabata ekiboca

 

Aparentemente mi tabata ekiboca. Ora mi a wak e begroting di Aruba mi a realisa cu e gastonan di proyectonan manera Linear Park no ta compara cu e personeelskosten annual di Gobierno. E pie-chart aki bou ta mustra cifranan di e begroting di Aruba pa 2017. Eynan nos por wak cu ongeveer 34% di e gastonan di Gobierno ta personeelskosten, esaki ta inclui salarionan di tur ambtenaar, plus gastonan cu ta bin erbij manera AZV y pensioen. E bedrag ta 466 miyon.

Pero no ta tur empleado cu ta wordo paga cu placa di Gobierno ta inclui den e 34% aki. E no ta inclui tur salario di docente bijvoorbeeld, pasobra Gobierno di Aruba ta duna varios institucion escolar subsidies, manera EPB, anto cu e suma aki e docentenan ta wordo paga. Dus e porcentahe actual ta mas halto ainda.

 

Rentekosten in verhouding tot de totale kosten 2015

legend.png
Fuente: Landsverordering Begroting Aruba 2017

 

Personeelskosten di Aruba semper tabata asina halto? Con nos a yega kinan? Den e ultimo 20 añanan zowel e aantal personeel y e kosten per personeel a subi notablemente. No tin casi niun diferencia entre e temporada cu MEP tabata na mando y e temporada cu AVP tabata na mando, tur dos partido a contribui. Awo na 2016 tin 3000 mas ambtenaar cu 20 aña pasa. Esey kiermen cu e ambtenarenapparaat (cuanto empleado ta traha pa Gobierno) a casi dobel.

Porta bo ta pensa cu Aruba a crece, dus Gobierno mester mas trahado pa duna e pueblo e servicionan necesario. Ya caba na aña 1990 Worldbank a conseha Aruba pa reduci e ambtanerenapparaat cu 15%. Gobierno a tuma e conseho y a logra reduci e ambtenarenapparaat temporalmente, pero no mucho tempo despues ora oposicion a drenta na mando, e ambtenarenapparaat e crece bek, y e la keda crece den e decadanan cu a sigui.

Na 1995 segun Censo tabata tin 80 mil hende ta biba na Aruba, y e tempo ey Gobierno tabata tin 3800 empleado, esey kiermen cu 4.75% di e populacion tabata traha pa Gobierno. Awo 6,1% (6.750/110.000) di e populacion ta traha pa Gobierno, dus te hasta relativamente e aantal ambtenaren a subi. E verschil di 1.35% no ta parce hopi, pero loke cu e cifra ki ta representa ta cu e ambtenarenapparaat a crece cu 28% (1,35/4,75=0,28) den e ultimo 20 aña nan aki, despues cu bo corigi pa crecemento di poblacion.

Si e ambtenarenapparaat no a crece asina hopi Aruba su debe no lo ta asina grandi

 

Ora e ta bay over di sumanan grandi, 28% ta bira hopi significante. Si e ambtenarenapparaat a crece hunto cu e poblacion di Aruba, e personeelskosten pa aña 2015 lo ta 336 miyon, cu ta  130 miyon menos cu awo. Aruba no lo tin un begrotingstekort, y nos lo por a cuminsa paga parti di nos debe bek. Esey ta cu mi no a ni considera tur e añanan anterior. Si e ambtenarenapparaat no a crece asina hopi Aruba su debe no lo ta asina grandi. Pero ja, no tin mucho sentido pa papia over di con cos por a bay miho. Den todo caso ta importante pa tin esaki den mente pa nos no sigui empeora e situacion.

Mi a compara e situacion di Aruba awo cu con e tabata 20 aña pasa, pero porta bo ta pensa cu e tempo ey tabata tin mucho tiki hende ta traha pa Gobierno, y cu e situacion awo ta normal y manera mester ta. Pero si bo compara e personeelskosten di Aruba cu otro paisnan bo ta ripara cu e gastonan di Aruba ta mucho halto. No tin mucho sentido pa compara Aruba cu un pais mas grandi manera Hulanda, pasobra e situacion na e dos paisnan lo ta mucho diferente. Door cu Curaçao tambe ta un isla y ta di tamaño comparabel cu Aruba, e ta un bon pais pa compara Aruba cu ne.

 

Aunke cu Curaçao su poblacion ta 50% mas grandi cu di Aruba, nan ambtenarenapparaat ta mas chikito cu di Aruba

 

Aunke cu Curaçao su poblacion ta 50% mas grandi cu di Aruba, nan ambtenarenapparaat ta mas chikito cu di Aruba. Segun e cifranan di Stichting Deugdelijk Bestuur Aruba, Curaçao tin 4.616 ambtenaren, y Aruba tin 5.757 ambtenaren. Esey kiermen cu na Curaçao 1 den cada 33 hende ta empleado di Gobierno, terwijl na Aruba 1 den cada 18 hende ta traha pa Gobierno. Mi no ta bisando cu e situacion na Curaçao ta ideal y cu nos mester tuma nan como voorbeeld. Loke cu mi kier ilustra ta cu e ambtenarenapparaat na Aruba ta demasiado grandi compara cu otro paisnan, y cu esaki ta un punto caminda e Gobierno di Aruba por mehora.

Un par di cambio den e personeelsbeleid di Gobierno lo por elimina nos begrotingstekort por completo. Ta berdad cu Gobierno a cuminsa tuma par di medida pa controla e personeelskosten. Den mi proximo artikel mi lo skibi over di cua medida a wordo tuma y ki impacto esaki tabata tin te awo.