SEGURO MEDICO: UN INTRODUCCION

15 aña pasa gobierno di Aruba a introduci un seguro medico social: Algemene Ziektekosten Verzekering (AZV). Un seguro medico social ta un sistema unda gobierno ta sigura cu ful e pueblo tin seguro medico, esaki ta inclui hende grandi, mucha, personanan incapacita y personanan sin trabou.

Hopi biaha AZV ta den prensa y ta wordo critica. Mastanto e critica ta dirigi na kico tur ta wordo cubri door di AZV, pero tambe e problema financiero. Pero dicon eigenlijk AZV a wordo introduci? Den e prome articulo di e series di AZV, mi lo conta untiki di e historia di seguro medico na Aruba y tambe con AZV ta funciona.

 

Untiki di e historia di seguro medico na Aruba

 Box 1. E diferente categoria di seguro medico den pasado

Box 1. E diferente categoria di seguro medico den pasado

Prome cu AZV a wordo introduci, tabata tin diferente categorianan di seguro medico (tabel 1). Den box 1 bo por lesa den mas detaye con e diferente categoria ta reparti. Mane bo por lesa, tabata tin diferente categorianan y nan no ta facil pa separa for di otro. Ora cu mi a entrevista diferente dokter y apotheker over di e sistema prome cu AZV, nan tabata sa mas of menos con e categorianan tabata reparti, pero e no tabata ful claro.

Den un entrevista Dr. Jacques van Veen, cu tabata Directeur di Directie Volksgezondheid tempo cu AZV a wordo implementa, ta conta cu un problema grandi di tin tanto diferente categoria tabata cu gobierno no tabata tin control ni un idea di cuanto cuido medico tabata costa na Aruba. Asina no por a controla e budget pa salud, unda cu gobierno tabata tin problema pa paga dokternan. Tampoco tabata tin control riba e calidad di cuido medico, Van Veen ta sigui conta. Door cu gobierno no tabata tin suficiente control riba salubridad, e la haci e sistema medico vulnerabel pa corupcion. Segun un estudio di Edo Haan, hopi hende a logra haya un PPK pa motibo político, sin tabata tin derecho riba dje. 

 

 Tabel 1. Indeling di e  diferente   categorianan  di seguro prome cu AZV.

Tabel 1. Indeling di e diferente categorianan di seguro prome cu AZV.

Dr. van Veen ta conta cu un otro motibo dicon AZV a wordo introduci ta paso e personanan cu PPK tabata tin dificultad pa haya un sita na dokter. Nan mester a warda tin biaha hopi largo pa haya un sita, tanten cu personanan cu paga cash si tabata haya sita dibiaha. Ademas e seguro privanan no tabata cubri condicion medico pre-existente y SVB tabata cubri e condicionnan medico pa dos aña so. Esaki a haci cu un parti grandi di gasto medico di patientnan cu condicion medico pre-existente tabata mester a sali for di nan mesun cartera.

Segun Joost van de Kamp, Public Relations Officer di AZV, AZV si ta cubri e gasto di condicion medico pre-existente. Condicion medico incomun ainda ta un punto di discusion. Esaki mi lo mester investiga ainda y esaki lo por ta un topico pa un proximo articulo.  

Un problema grandi di tin tanto diferente categoria tabata cu gobierno no tabata tin control ni un idea di cuanto cuido medico tabata costa na Aruba.

 

E comienso di AZV

Na aña 1992 e ley pa introduci AZV a wordo aproba den parlamento. Na aña 1998 Centrale Bank van Aruba (CBA) a manda un carta pa Minister-President tocante e alcanse financiero di AZV. Den e carta aki CBA ta conseha gobierno pa implementa un mini-stelsel. Esaki ta encera cu personanan cu tin un entrada abou lo wordo cubri door di AZV y e personanan cu tin un salario mas halto, lo mester busca seguro priva.

Gobierno a dicidi di toch bai door cu AZV como un seguro medico social. Segun ex-Minister President meneer Henny Eman, gobierno a implementa AZV paso nan tabata kier pa tur hende na Aruba ta segura y tambe e hendenan cu salario mas halto lo ta esunnan cu lo contribui mas na AZV. E dos sistemanan aki mester wordo analisa mas profundo, prome cu por bisa cu un ta miho cu e otro. 

Na aña 2001, AZV a habri su porta como seguro medico pa tur hende cu ta inscribi na Censo di Aruba. Esaki a haci cu PPK no ta existi mas. Ademas, SVB a stop cu nan seguro medico. Hopi compania di seguro priva, manera Fatum, Ennia y New India Insurance tambe a stop nan seguro medico. Consequentemente, mayoria hende cu seguro priva a perde nan seguro.
 

   *: 0.5% empleado; 6.5% compania,  **: 2.6% empleado; 8.9% compania,  ***: 1.6% empleado; 8.9% compania.   Tabel 2. E entrada di AZV durante  a  ña

 *: 0.5% empleado; 6.5% compania,  **: 2.6% empleado; 8.9% compania,  ***: 1.6% empleado; 8.9% compania.

Tabel 2. E entrada di AZV durante aña

Desde comienso AZV tabata tin problema financiero. Dr. van Veen ta conta cu ora AZV a wordo implementa e tarifa tabata hopi abou, 7% di salario: 0,5% e empleado ta contribui y 6,5% e compania. Esaki a causa cu Gobierno mester a cubri un landsbijdrage basta grandi. Na aña 2001 e landsbijdrage tabata AFL 133 miyon. Na aña 2014 e tarifa tabata 11,5%, pero ainda e entrada di AZV no tabata suficiente y gobierno a dicidi di implementa BAZV, cu ta un porcentahe cu ta wordo paga riba tur benta di servicio y producto (indirecte belasting). E BAZV tabata na principio 1% y e la bira 2% na juli 2015. Na mesun momento nan a baha e tarifa pa 10,5%. E idea tras di e BAZV ta cu trahado ilegal, turista y personanan sin trabou tambe lo contribui na e fondo di AZV.

Segun Dr. van Veen, ora parlamento a aproba e ley di AZV, nan a fiha pa ta budget neutral, pa e ora gobierno no mester cubri nan gastonan.  Sinembargo, ainda esaki no ta e caso. Na aña 2014 e landsbijdrage di gobierno tabata AFL 119,8 miyon. Despues cu a subi e BAZV di 1% pa 2%, e landsbijdrage di aña 2015 a baha pa AFL 53,8 miyon. Dr. van Veen ta conta cu awo si tin un miho bista riba e gastonan di cuido medico y esey por mira na AZV su jaarrekeningen.  Den tabel 2. por wak un resumen di e cifranan menciona.

 

CON AZV TA FUNCIONA 

 

 Figura 1. Organogram di AZV 

Figura 1. Organogram di AZV 

E Chief Executive Officer (CEO) ta encarga pa AZV funciona mane mester ta.  E Raad van Commissarissen ta controla e CEO y zorg cu tur cos ta bai segun e ley di AZV. E Raad van Commissarissen tambe ta e contacto entre AZV cu Minister di Salubridad. E Chief Medical Officer (CMO) ta e cabes riba e parti di cuido medico, dus e dokter, remedi  y specialistanan. E Chief Financial Officer (CFO) ta e cabes riba e parti financiero, e declaraties, administratie etc. Y e Chief ICT Officer (CIO) ta encarga cu ICT, dus e computernan, database y tambe promedico cu ta un sistema unda laboratorionan y dokternan por comparti informacion di patientnan.

 

Den un entrevista cu Joost van de Kamp, e ta conta over di con AZV ta funciona. AZV ta haya su fondo den tres manera: e tarifa di trahadonan, BAZV y e landsbijdrage. E landsbijdrage ta e suma cu gobierno tin cu cubri door cu e entrada di tarifa y BAZV no ta suficiente. Den figura 1 tin e organogram di AZV.

Segun Joost van de Kamp, AZV ta traha cu manpower planning pa calcula cuanto specialista, dokter y apotheker lo mester na Aruba. Asina nan ta dicidi cuanto y cua specialistanan nan ta tuma den servicio. Door cu Aruba ta un isla chikito, tin specialista cu no lo ta economico pa tuma den servicio segun e manpower planning. Esaki ta e rason cu no tin tur specialista na Aruba y pesey patientnan ta wordo manda afo pa tratamento. Joost van de Kamp ta conta cu cardiologonan di Maastricht a yega di bin Aruba pa entrena e cardiologonan di Aruba haci operacion di pone un stent. Al final e la sali mas caro pa haci e operacion na Aruba, cu si lo a manda e patient afo. Pero e beneficio di hacie na Aruba ta cu e patient por keda na cas cu su famia. Esaki ta consideracion cu Minister di Salubridad Publico y Minister di Finansas mester haci.  

Door cu Aruba ta un isla chikito, tin specialista cu no lo ta economico pa tuma den servicio

 

Ademas e la splica cu tin un comision independiente: Commissie Grensoverschrijdende Zorg (CGZ) cu ta dicidi ken ta wordo manda afo pa tratamento. E comision aki ta consisti di 4 diferente specialista y un consehero medico di AZV, pero e consehero no tin derecho di vota. E administracion di e comision ta wordo haci door di un trahado di AZV y nan gastonan ta wordo cubri door di AZV.

E palabra independiente ta dudoso paso e comision aki ta cay bou AZV, pero solamente e 4 specialistanan ta haci a decision di ken ta wordo manda afo y AZV no por involucra su mes den e decision. Mi a puntra AZV ken ta dicidi ken ta den e comision y con e decision ta wordo haci, y mi no a haya un contesta bek ainda.  

Den e articulo aki ainda e contesta riba e pregunta “Dicon AZV a wordo introduci?” no por wordo contesta completamente. E sistema prome cu AZV no tabata ful claro y no tabata tin bon control riba e gastonan di cuido medico. Manera a wordo menciona, un di e motibonan pa a introduci un sistema di seguro medico social ta pa tin un miho bista y control riba e gastonan y tambe vigilancia riba e calidad di cuido medico.

Pero esaki no specificamente kemen cu mester implementa un sistema manera AZV. Ban bisa, porta e sistema cu CBA a propone tambe lo por a mehora e situacion. Den e proximo articulo, mi lo werk uit e beneficio- y e limitenan mas importante di seguro social en general y mas en specifico di AZV. Asina bo por haya un miho idea dicon AZV a wordo implementa y tambe por wak si bo ta di acuerdo cu e implementacion di AZV.