InsureToStudy: E bentaha y desbentahanan

Den e serie di articulo di InsureToStudy Crescenzia Biemans ta elabora riba e bentahanan y desbentahanan, e historia y e leynan tras e compania di seguro priva InsureToStudy B.V. Un compania cu ta situa na Hulanda. E articulo aki ta aspira pa informa studiantenan di Aruba riba e ley cu ta categorizanan manera 'inhabitantenan temporario' y e opcionnan cu ta bin cu esaki. E problema mas grandi cu lo wordo discuti ta cu studiantenan cu Arubalening ta wordo motiva pa tuma e seguro aki sin di a haya mas informacion tocante e diferente posibilidadnan.

Version na Ingles disponibel akinan.

Ora mi a bin biba na Hulanda den 2013 mi tabata hopi entusiasma pero tambe nervioso. Hopi cos di bida mi mester a siña ainda con nan ta funciona. Manera hopi hende na e edad cu mi tabata tin, cu a biba un bida comodo den e cas di nan mayornan, separa di e realidad di bida, ami no tabata sa con e proceso di registracion pa bay biba na un otro pais ta bay. Mi tabata keda confundi ora mi tende e palabranan kwijtschelding of huur- y zorgtoeslag. Pa haci mi bida mas facil mi a dicidi di inscribi pa haya Arubalening, asina aki e Plaatselijke Opvang Commissie lo por yuda mi cu ful e proceso di registracion aki. Nan a yuda regla cuenta di banco y nan a yuda mi inscribi na e municipio di e luga unda mi a bay biba. Nan a splica tambe cu na Hulanda nos tur mester ta sigura sino nos lo haya boet. Nos a wordo bisa pa tuma e pakete di seguro medico priva di e compania ONVZ, un pakete negocia cu e compania Boogaard Assurantiën N.V. Den e splicacion riba e situacion di seguro nos a wordo bisa cu nos no lo por haya un pakete di seguro medico publico paso nos no ta traha na Hulanda. Pa no haci e situacion di seguro mas complica, ami, hunto cu e otro studiantenan di Amsterdam, a dicidi di tuma e pakete cu nan a ofrece nos.

Pa haci mi bida mas facil mi a dicidi di inscribi pa haya Arubalening.

Manera mayoria pais, Hulanda ta ofrece su residentenan cu numeroso opcion di seguro. Tur persona cu ta biba of traha na Hulanda, pa ley, ta obliga pa tuma un plan di seguro cu ta cubri e gasto medico basico. Esaki ta inclui, por ehemplo, e gasto di bay doctor di cas y dentista. Si un persona ta un ciudadano Hulandes, ta traha y tin un edad di mas cu 18 aña, e persona ta obliga pa tuma un seguro medico publico. Pa asina e ta garantisa cu e tin un seguro medico basico. Pero si e persona ta un studiante internacional y e no tin un trabou, e persona aki no ta obliga pa tuma un seguro medico publico y ta haya e opcion pa por dicidi pa tuma un seguro medico priva.

Desde cu mi a bin biba na Hulanda, un otro compania a wordo encarga pa regla e seguro di e studiantenan di Aruba. Na aña 2015 esaki a wordo poni den man di e compania InsureToStudy B.V. Mi experiencia cu ONVZ y InsureToStudy ta un similar, y den varios caso negativo. Hopi studiante, ami mes inclui, a haya nos mes ta reclama paso nos seguro no a wordo reconoci door di institucionnan medico na Hulanda. Pa e motibo aki mi a dicidi di bay busca y haya sa kico realmente e motibo ta dicon nos ta wordo bisa pa tuma e pakete di seguro medico priva imbes di un cu ta publico, manera tur otro ciudadano Hulandes tin. Mi no por a compronde dicon studiantenan di Aruba si por bin den consideracion pa haya huurtoeslag, kwijtschelding y otro benificionan cu ta wordo ofreci den e systema Hulandes, pero no den e caso di e servicio di seguro. Dicon nos ta wordo mira manera studiantenan internacional siendo cu nos tin nacionalidad, residencia y educacion Hulandes?

 

Studiantenan di Aruba bibando na Hulanda ta cai bou articulo 20 di e documento “Besluit uitbreiding en beperking kring verzekerden volksverzekering 1999”. Den articulo 20 ta para cu personanan cu a bin biba na Hulanda cu motibo pa solamente sigui un estudio no por wordo segura usando e leynan nacional di seguro. Ta wordo menciona specificamente cu esaki ta e caso pa studiantenan cu ta bin for di Aruba, Curaçao, Bonaire, St. Maarten, St Eustatius and Saba. Ora mi a yama Sociale Verzekeringsbank (SVB) den zomer, nan a splica mi cu studiantenan di Aruba no ta wordo pidi pa tuma un plan di seguro medico publico manera un otro ciudadano Hulandes paso nan no ta wordo mira como un residente permanente. E studiantenan ta wordo mira como un residente temporario, cu solamente a bin biba pa sigui un estudio.

E regla aki ta bin cu su excepcionnan. Na prome luga, di un studiante cu ta traha part-time ta wordo exigi pa e tuma un plan di seguro publico Hulandes. Esaki ta e unico excepcion concreto unda e studiante no solamente ta haya e derecho pa scoge un plan di seguro publico, pero esaki ta wordo exigi di dje. Pero esaki kiermen cu e unico manera pa haya un plan di seguro publico ta door di traha? Tecnicamente, no. Esunnan cu por prueba cu nan a bin biba na Hulanda cu intencion pa keda biba tambe despues cu nan caba cu nan estudio tambe tin e derecho pa inscribi pa un plan di seguro publico. SVB a splica cu e cierto manera cu e studiante lo por prueba cu e tin plan pa keda ta door di, por ehemplo, tin yiu cu ta naci na Hulanda, a casa cu un residente Hulandes, a cumpra propiedad, etc. E chens cu un compania di seguro ta nenga di tuma e studiante ta chikito y tin mas cu suficiente compania cu e studiante por scoge pa inscribi su mes na dje.

ZORGTOESLAG

Studiantenan di Aruba cu no ta traha y tin un plan di seguro medico publico no ta bin den consideracion pa haya Zorgtoeslag, cu ta un entrada cu ta yuda cumbri e gasto halto di seguro. E gasto di seguro ta normalmente entre 90 y 105 euro pa luna. Den 2016 residentenan Hulandes (of esunnan cu tin un permiso di residencia valido, cu tin un plan di seguro medico publico Hulandes, cu tin un entrada relativamente abou y ta ariba di e edad di 18 aña) a haya un suma maximo di 998 euro na zorgtoeslag. Esaki ta calcula pa bira 1066 euro den 2017. Maske cu mayoria di e studiantenan por cumpli cu e exigencia menciona, door di e ley menciona mas prome, si nan no tin un trabou, nan no por aplica pa zorgtoeslag sin bin den riesgo pa haya boet.

Pa e ultimo 20 añanan gobierno di Aruba a regla un plan di seguro medico priva pa e studiantenan.


Sin embargo, paso e systema Hulandes ta manera cu e ta, pa e ultimo 20 añanan gobierno di Aruba a regla un plan di seguro medico priva pa e studiantenan. Prome cu 2015 e compania ONVZ tabata encarga cu e tarea aki, un plan negocia cu e compania Boogaard Assurantiën N.V. Tur studiante tabata wordo cubri bou e pakete di Basisfit Internationaal, Extrafit Internationaal y Tandfit B. E gasto pa e pakete aki tabata 279,24 euro pa trimester, cu ta 93,08 euro pa luna. Esaki tabata wordo paga, indirectamente, door di Arubalening. Locual kiermen cu studiantenan lo mester a paga esaki despues bek cu un interes di 6%. E prijs tabata comparabel cu locual tabata por wordo ofreci door di companianan di seguro medico publico Hulandes. Pero studiantenan no tabata por a bin den consideracion pa haya Zorgtoeslag. No tabata tin e gasto obligatorio di “eigen-risico” den e pakete pa e studiantenan pero e plan di seguro no tabata wordo reconoci tur ora na institucionnan medico manera doctor di cas of hospital. E inconsistencia den wordo reconoci tabata un problema grandi, unda bo ta haya e situacion cu cierto studiante no tabata tin problema pa wordo cubri pero hopi otro studiante mester a paga e suma nan mes pa despues bay pidi e bek for di e compania di seguro.

Cu e introduccion di InsureToStudy na 2015, e gasto pa luna a baha pa 54,50 euro pero hopi di e problemanan a keda mescos. E cambio di ONVZ pa InsureToStudy a resulta di scapa e studiantenan 462,96 euro pa aña. Pa studiantenan cu tabata traha part-time of cu a haci un stage, InsureToStudy a ofrece nan un basiszorgverzekering via e compania Turien & Co. E gasto pa esaki tabata 75,80 euro pa luna den 2015 y 84,50 euro pa luna den 2016.

Cu e introduccion di InsureToStudy na 2015, e gasto pa luna a baha pa 54,50 euro pero hopi di e problemanan a keda mescos.

Na cuminsamento di e aña aki Turien & Co. no ta encarga mas cu e tarea aki, e basiszorgverzekering ta wordo duna awo door di e compania HollandZorg. Cu e anuncio di e cambio aki por a observa cu studiantennan no ta keda bon informa riba e asuntonan di nan seguro. Mirando cu e informacion di e anuncio aki a wordo duna ora e cambio a wordo haci caba. Hopi a keda confundi cu kico e cambio aki kiermen y con e compania ta hinca den otro. Sharrity Oduber, un studiante cu ta biba y traha na Rotterdam, ta splica cu su experiencia cu InsureToStudy no tabata negativo pero cu e ta sinti cu tabata tin mester di mas transparencia ora e transicion aki a pasa. Ora e la pidi pa nan dun'e e “polis voorwaarden” nan a bis'e cu esey no ta posibel. E motibo cu a wordo duna pa esaki ta cu e lo mester firma e contract prome cu esaki lo por wordo manda. Ademas nan a splica cu HollandZorg no kier revela e informacion aki paso nan no kier pa otro cliente purba busca e “deal atractivo” aki, unda cu e eigen-risico a wordo paga caba. E ta haya cu e ta su derecho como cliente pa haya e informacion aki prome cu e ta firma paso e kier ta sigur cu e lo haya e mes un cobertura. Segun articulo  17 lid 6 of the Zorgverzekeringswet e compania di seguro lo mester dispone un "modelovereenkomst" unda e derecho y deber di e cliente ta wordo mustra y e gasto basico ta wordo deriva for di e zorgpolis. E la firma pa su contract nobo caba y ainda ta wardando pa haya e modelovereenkomst y e zorgpolis. Den atriculo 9 lid 1 di e mes un ley ta wordo stipula cu e zorgpolis lo mester wordo manda lo mas pronto posibel despues cu un cliente firma pa un seguro.

Bentahanan

Prome cu nos sigui elabora riba e problemanan cu ta rondona InsureToStudy, nos mester wak kico ta e bentahanan di dje. E plan di seguro di InsureToStudy ta sali mas barata cu esun di un compania di seguro medico publico Hulandes. Den cierto instancia e plan di InsureToStudy ta hasta cubri  un suma di gasto mas halto cu otro companianan, por ehemplo un suma di 150 euro pa bril di bista y contactlens. Esaki ta 50 euro mas hopi cu mayoria compania di seguro medico publica ta cubri na Hulanda. Tambe e plan ta cubri e gasto di vuelo den e caso si un miembro di famia mester fayese. Esaki ta garantisa cu e studiante por bula bay bek Aruba si algo mester pasa cu un miembro di famia. Ademas, e plan di InsureToStudy no tin e gasto obligatorio di “eigen-risico”. E gasto aki tin un suma maximo di 385 euro (hyperlink) pa aña. E suma aki ta wordo cobra solamente na  hende cu tin un pakete basico (basiszorgverzekering) na un compania di seguro medico publico Hulandes. Esaki kiermen cu e studiantenan no lo mester paga ora di bishita doctor di cas, pero si ora mester bishita un specialista of hospital. Si e situacion presenta su mes cu e studiante lo mester paga un suma di 385 euro, e suma aki lo wordo parti den e cantidad di luna cu falta ainda den e aña. Esaki pa haci e suma di e gasto pisa menos pa e studiante.

Maske cu opinion riba e experiencia cu InsureToStudy ta varia, tin varios caso cu studiantenan ta bisa cu nan ta contento cu e servicio door di e motibonan menciona. Daniella Arends, un miembro di Fuente, ta splica cu su experiencia cu InsureToStudy semper tabata positivo. E plan di seguro a cubri varios test di laboratorio, fisioterapia y hasta atencion medico na Aruba. Ora di paga Daniella solamente mester a scan e recibo y e-mail e pa InsureToStudy. E compania lo a paga tur gasto directamente. Kiara Van Trikt, un studiante bibando na Amsterdam, tambe ta splica cu e tabata tin bon experiencia cu InsureToStudy. Nan a cubri e gastonan di su bril di bista y fisioterapia. Tambe e ta gusta cu nan ta paga e declaracion lihe.

E plan di seguro a cubri varios test di laboratorio, fisioterapia y hasta atencion medico na Aruba.
— Daniella Arends



Un ehemplo den con opinion riba e experiencia cu InsureToStudy ta varia ta cu e caso di Haischel Dabian. Haischel, un otro miembro di Fuente, ta conta cu su experiencia ta net e contrario di esun di Daniella y Kiara. Tur biaha cu e mester a pasa cerca un insitucion medico su seguro no tabata wordo reconoci.

“Mi experiencia cu InsureToStudy tabata malo. Mi a dicidi di kita for di InsureToStudy despues cu mi a haya un accidente grave, unda mester a wordo opera riba mi man despues cu un auto a dal mi ora mi tabata riba mi bais bayendo universidad. Mi a wordo hiba hospital cu ambulance y na hospital nan a informa mi cu algo no tabata bon cu mi seguro, y si mi no por resolve esaki mi lo mester paga tur cos mi mes. Mi no por a haya InsureToStudy na liña y mi mester a bay via Arubahuis pa regla e asunto di seguro. Bo por imagina bo mes cu tur esaki tabata e ultimo cos cu mi kier a haci na e momento ey. Te e dia di awe, locual ta mas cu un aña despues, mi a ricibi varios recibo di 2334,68 euro (e ultimo mi a haya riba 10 di december 2016) pa e gasto di e accident. Mi a purba yama varios biaha y a manda varios e-mail, pero te ainda nan no a paga.”

Mi experiencia cu InsureToStudy tabata malo.
— Haischel Dabian

 

Desbentaha

Awo ban wak e desbentahanan di InsureToStudy. E compania no ta wordo reconoci door di varios institucion medico. Manera cerca hospital, dentista, doctor di cas y specialista. Studiantenan tin cu of manda nan recibo via e-mail na e compania, of nan mester paga e suma nan mes anto despues, riba un otro tempo, pidi e bek. E proceso ta tuma aproximadamente 3 dia pa haya e placa bek. Si un studiante haya su mes den hospital, por ehemplo, y na e momento ey no por paga e suma riba nan mes, nan lo mester tuma contacto cu e compania di seguro pa puntra nan pa tuma contacto cu e hospital pa wak si nan por regla e pago directo. Den caso di emergencia den un weekend, e no ta posibel pa tuma contacto cu nan paso nan oficina no ta habri den weekend. E proceso aki ta ineficiente, y pa algun studiante ta trece cune frustracion. E seguro no ta cubri vacuna, profilax, anticonceptivo, HIV/aids, condicionnan preexistente, y tampoco cirugia cosmetico cu ta esencial pa e pashent.

Si un studiante logra haya zorgtoeslag, e ta sali mas caro pa keda cu InsureToStudy cu si e cambia pa un compania di seguro medico publico. Si un studiante ta paga, por ehemplo, 104,50 euro pa seguro cerca Friese Boeren en Tuinders Onderlinge (FBTO) y ta haya pa luna 88,83 euro bek via zorgtoeslag, e studiante ta paga 15,67 euro so cada luna. Esaki ta 38,83 euro menos cu locual e tin cu paga si e keda cu InsureToStudy. Hasta si e studiante mester paga algo bek di nan “eigen-risico”, e gasto pa luna lo keda menos si compara esaki cu esun di InsureToStudy.

Un otro problema cu studiantenan a reclama di dje ta e dificultad di stop nan seguro na InsureToStudy. Algun a wordo bisa door di InsureToStudy cu despues prome di Januari di cada aña e seguro no por wordo para mas. Otro studiantenan, ami mes inclui, a wordo bisa cu studiantenan cu tin Arubalening ta obliga di tin e seguro aki. Viviana Lopez, un hoben Arubiano cu ta studiando pa su masters na Hulanda, ta splica cu ora el a logra cancela su contract, nan a keda cobr’e pa aproximadamente tres luna, a pesar di su esfuerso pa demonstra cu el a cancela su contract. Recien nan a bolbe cobra Viviana y otro studiantenan, cu a informa cu nan kier cancela nan contract, paso nan a wordo inscribi automaticamente den e lista nobo ora e cambio pa HollandZorg a wordo haci.

Ora el a logra cancela su contract, nan a keda cobr’e pa aproximadamente tres luna, a pesar di su esfuerso pa demonstra cu el a cancela su contract.

 

E problema mas grandi ta e falta di informacion cu no ta wordo duna door di InsureToStudy, y e institucionnan di Aruba cu ta avisa nos pa tuma e seguro aki sin splica e otro opcionnan cu studiante tin. Studiantenan lo mester wordo informa cu InsureToStudy no ta e unico opcion cu nan tin. A lo largo tin hopi otro seguro priva cu ta traha pa studiantenan internacional y tambe tin e opcion pa tuma un seguro publico. Ademas, e distincion di e studiantenan di Aruba den e ley Hulandes ta un topico importante cu lo wordo discuti den un otro articulo.

E decicion pa keda cu InsureToStudy of kies un plan di seguro medico publico, manera cerca FBTO of Unive, ta keda den man di e studiante. E ta keda na e studiante pa kies kiko e ta haya ta mas importante, entre reconocemento di nan seguro of wordo cubri cu un suma mas halto den cierto instancia sin mester paga e suma di “eigen-risico”. Un compania di seguro medico publico Hulandes su reconocemento ta universal y e studiante tin e capacidad di scoge entre varios compania cu plannan cu diferente prijs. Esaki por sali caro si pa e studiante si e no bin den consideracion pa haya zorgtoeslag of si e studiante mester haya atencion medico y e ta wordo exigi pa e paga un suma di “eigen-risico”. A pesar cu InsureToStudy no tin e suma di “eigen-risico” aki y ta cubri studiante pa gran parti riba e area nan fundamental di salud, e no ta wordo reconoci door di varios institucion medico y e ta exigi esfuerso adicional di e studiante mes ora nan ta den e situacion cu nan mester wordo sigura. Den e proximo articulo mi lo explora e origen di InsureToStudy y e controversia rondonando e proceso cu a wordo tuma ora nan a wordo escogi como e compania cu lo wordo encarga di e seguro di e studiantenan.


Bo lo kier comparti bo experiencia cu InsureToStudy cu nos? Laga un comentario abou.

Traduccion na Papiamento: George Thiel.